O entusiasmo e o sentimento de identificación que evoca Jane Austen son tan profundos que as interpretacións contemporáneas situaron a escritora no centro da súa familia, da súa sociedade e mesmo do seu tempo, observándoa e debaténdoa —os seus gustos, os seus amores, as súas desgrazas e as súas características literarias— segundo a importancia da que goza na actualidade. É gratificante que o tempo compense algunhas das crueldades coas que a historia aflixiu as autoras do século XIX, pero insistir nesta versión lévanos a perder unha das perspectivas máis interesantes, intelixentes e incomprendidas da historia da literatura.