Que pasaría se unha mañá decidises cambiar o rumbo do teu día? Se por unha vez deixases de lado todos os plans que fuches elaborando na túa cabeza con milimétrica perfección. Se te propuxeses fuxir da hiperconectividade, das présas e das tarefas que te autoimpós.
Ás veces é necesario baixar o ritmo: deterse, camiñar sen destino, mergullarse no presente e mirar. Mirar é unha elección, lémbranos Agustina Guerrero nesta novela gráfica que transcorre nunha transformadora xornada en Barcelona: un día dedicado a deixarse levar, a escoitar as historias que a cidade ten que contarlle e a abrirse a que xurda o inesperado. Porque son precisamente eses momentos nos que un se permite observar, sentir e improvisar os que deixan unha maior pegada na memoria e danlle sabor e sentido á vida.