Que nos mantén espertos pola noite? Ana Penyas busca dar resposta a esta pregunta. A autora dirixe a súa mirada atenta, crítica e reveladora cara ao insomnio, a angustia compartida que se converteu nun dos grandes males da nosa era.
En vela é unha historia coral que transcorre durante seis noites e un día. As horas sen durmir revelan situacións de precariedade laboral, incerteza e desigualdades sociais que a miúdo se transforman en pantasmas. Ademais, a falta de desconexión das pantallas e o consumo de ansiolíticos como ferramenta para soster a vida deixan unha pegada profunda na saúde mental.