Trasgos, bruxas, monstros do bosque, unicornios, nenos, gatos e pingüíns parlantes... Tamén zombis que usan reloxos para facer exercicio, o regreso de Christine —o auto diabólico de Stephen King— traballando de Uber e a vida en todas as súas formas: do espazo exterior ás estreitas paredes dunha oficina corporativa. Os límites habituais da clásica tira cómica diaria non se aplican á imaxinación nin aos temas de Macanudo.
Con encanto, lixeireza e corazón, Liniers achega a súa distintiva liña gráfica e as súas sensibles acuarelas a todo o que se lle poida pasar pola cabeza un día calquera. Xa sexa para facer un comentario sobre a cultura pop, o mundo en que vivimos ou o medio ambiente, ou para celebrar a arte, a natureza ou o acto de ler, Liniers expresa as súas ocorrencias con alegría e beleza. E case sempre resulta, ademais, moi gracioso.