A mediados da década de 1990, o historietista Joe Sacco finalizou a súa obra xornalística máis ambiciosa ata a data, Palestina, e centrou a súa mirada nun conflito que todo o globo contemplaba con horror e consternación: a Guerra dos Balcáns.
De todos os lugares que visitou durante a súa estancia en Bosnia entre 1995 e 1996, o que máis paixón e interese lle suscitou foi o enclave musulmán de Gorazde, duramente azoutado polas tropas serbobosnias, illado durante anos do resto do mundo, e habitado por xentes que se debatían entre a desesperanza máis pesimista e a ilusión dunha paz cada vez máis improbable. A esta cidade dedicoulle o seu segundo libro, destinado a consagralo como unha das voces máis relevantes da novela gráfica actual.
A presente edición inclúe unha introdución a cargo do escritor e xornalista Christopher Hitchens, abundante material inédito, unha disertación documental do propio Joe Sacco e unha entrevista do prestixioso crítico e editor Gary Groth ao autor.