Alicia é unha moza do noso tempo, curiosa e chea de preguntas: como vivir?, que valores seguir?, que mundo queremos construír?, como podo ser útil á sociedade? En busca de respostas, embárcase nunha viaxe imaxinaria polo País das Ideas. Alí percorrerá séculos e civilizacións, e conversará cos grandes filósofos de Oriente e Occidente. Ao longo dunha vintena de aventuras, viaxará desde o Xardín de Epicuro até a última clase de Hegel en Berlín. Dialogará con Sócrates na ágora de Atenas, penetrarase na caverna de Platón, cruzará o Ganges, escoitará a Buda, interrogará a Lao Zi, deambulará por Sils-Maria con Nietzsche e cuestionará a Freud na súa consulta de Viena. Tamén se reunirá con Spinoza e Rousseau, entre outros. Todo cun obxectivo claro: atopar a frase (ou máxima) que se tatuará no brazo como compás vital. Un relato vibrante que entrelaza imaxinación, pensamento e aventura, ideal para lectores que buscan algo máis que unha historia.