No corazón de Yeonnam-dong, un vibrante barrio de Seúl, entre cafés vangardistas e tendas exclusivas, unha pequena lavandaría ofrece algo que non ten prezo: entre luces cálidas, libros e o reconfortante aroma a café e roupa recentemente lavada, os veciños atopan un recuncho de calma no medio do bulicio, un refuxio no centro da cidade a calquera hora do día.
Unha mañá, un cliente esquece alí un caderno e as súas páxinas empezan a encherse de confesións, medos e soños anónimos. Descoñecidos que antes só se cruzaban en silencio comezan a entrelazar as súas vidas a través das palabras, compartindo apoio e consolo. Pero un día, o diario revela un relato máis escuro. Agora, os habituais da lavandaría deberán desentrañar o misterio para protexer a harmonía da comunidade que, sen darse conta, construíron xuntos.