Fiskadoro ten catorce anos e vive nos Cayos de Florida, nunha comunidade de sobreviventes do desastre nuclear que destruíu o mundo. Durante o día axuda aos seus pais coa pesca en alta mar, aínda que a súa verdadeira aspiración é aprender a tocar o clarinete. Para logralo recorrerá a míster Cheung, manager da Orquestra Sinfónica e vello albacea da cultura humana, que será o seu mestre e guía a través das ruínas da civilización e que ademais convive coa súa nai, unha anciá obstinada en rememorar unha e outra vez a caída de Saigón. No medio deste clima a un tempo hostil e familiar, Fiskadoro deberá sobrepoñerse ás outras leccións que conleva crecer: saber despedirse cando xa non queda nada e repoñerse cando queda todo por facer.