No medio da promoción da súa primeira novela, Vanessa Springora recibe unha chamada da policía para que acuda a identificar o corpo sen vida do seu pai, un home fabulador e misántropo que terminara por converterse nun estraño para ela. Pero ao baleirar a súa casa, algo chama a súa atención: dúas fotos antigas do seu avó paterno nas que exhibe a esvástica. Un descubrimento que bota por terra a versión do querido avó checo, Josef, recrutado á forza polo exército nazi, desertor en Francia, colaborador dos estadounidenses durante a liberación e «refuxiado privilexiado» como disidente do réxime comunista.
Comeza así unha obsesiva procura para saber quen era en realidade ese home que lle deu o seu apelido e como puido ou non «consentir» a barbarie. Ao longo de dous anos, Vanessa rastrexará documentos familiares, arquivos checos, alemáns e franceses, e reunirase con testemuñas para tratar de recompoñer un itinerario verosímil. Pero sempre faltan pezas.
Alternando ficción, investigación, diario de viaxe e lendas familiares, e con Kafka, Gombrowicz, Zweig ou Kundera en mente, Springora mergúllase na historia do século XX para reflexionar sobre a natureza implacable da liñaxe e o poder devastador do que foi silenciado.

Título orixinal: Patronyme