Os aceleradores de partículas son máquinas potentes e complexas que nos permiten xerar, confinar e acelerar partículas cargadas. Desta forma, conseguimos densidades de enerxía enormes para acceder ao mundo subatómico cunha precisión e resolución sen precedentes, inalcanzables con outras tecnoloxías. Despois de case un século de innovación e desenvolvemento, os aceleradores de partículas continúan impulsando o descubrimento científico, o benestar humano e o crecemento económico en campos tan diversos como a física nuclear e de partículas, a ciencia dos materiais, a bioloxía, a medicina, a industria, a seguridade e o medioambiente. Os aceleradores de partículas son ferramentas indispensables no noso mundo moderno e moitas das tecnoloxías que nos rodean serían inimaxinables sen eles.

Este libro realiza un breve percorrido pola historia dos aceleradores de partículas, onde explica cales son os principios físicos e tecnolóxicos básicos detrás do funcionamento destas máquinas e describe algunhas das súas moitas aplicacións. Ademais, faise unha exposición das principais liñas de investigación e retos no campo da física e tecnoloxía de aceleradores de partículas.