O cerebro infantil é extraordinariamente plástico, capaz de adaptarse, crecer e reconfigurarse en función das experiencias que vive. Nunca é demasiado tarde para reaprender e modificalo. Da unión da neuroeducación e a crianza respectuosa resulta unha metodoloxía que, baseada na evidencia, ofrece ás nenas e nenos retos e experiencias que lles permitan explorar as súas habilidades e descubrir as súas fortalezas.

Neurocriar é amor incondicional, é darlles aos nosos fillos as mellores ferramentas para crecer cunha saúde mental e emocional óptima. Porque o maior agasallo que podemos facerlles é a capacidade de vivir e sentir plenamente, con confianza en si mesmos. Cando entendemos como funciona o cerebro infantil, educar resulta máis sinxelo.