O alcoholismo é como un elefante que entra na nosa casa e que, ao principio, mesmo nos fai graza. Co tempo, o elefante crece, apodérase de case todo o espazo do noso fogar e empeza a condicionar as condutas de todos os membros da familia. De todos. O problema é que se trata do noso elefantito, que agora creceu, pero é noso. E, a pesar das complicacións que provoca, ninguén se atreve a dicir nada. Isto é o que ocorre co alcoholismo familiar: a vergoña de pacientes, familias e amigos provoca que non se atrevan a falar deste problema.