Este libro selecciona vinte e cinco ficcións da mellor e máis representativa narrativa curta de Joaquim Maria Machado de Assis (1839-1908), en concreto aquelas que posúen unha maior potencia de actualidade e en que, desde o pasado, o xenial escritor conseguiu dicir e narrar para os sucesivos futuros por vir; aquelas, en fin, que nos axudan sempre a comprendernos mellor. A xigantesca vertente ficcional da obra breve dun tan xenial escritor, máis de cen anos transcorridos, continúa a falar por extenso da "umana" materia bocacciana para os nosos corazóns e para as nosas mentes, merecendo, a rigor, figurar na nosa sensibilidade moderna polas numerosas ocasións en que se referiu con autenticidade aos nosos sentimentos, grandezas, contradicións e limitacións.