Rexentada polo antigo policía Nagare Kamogawa e a súa filla Koishi, e disimulada entre as populosas rúas de Kioto, áchase a taberna Kamogawa, un pequeno local onde se pode comer marabillosamente ben... e reencontrar o prato que marcou as nosas vidas. Porque, grazas aos recordos a miúdo borrosos dos clientes, pai e filla, investigadores gastronómicos, recompoñen cada receita perdida con insólita eficacia: os ingredientes e a súa orixe, os tempos e maneiras de preparación e mesmo os persoalísimos segredos culinarios dos cociñeiros orixinais. Á fin e ao cabo, do que se trata é de recrear sabores únicos salpicados de nostalxia.