Que teñen en común Hipatia, Giordano Bruno, Émile Zola, Martin Luther King e Anna Politkóvskaya? Que todos eles, cada un coas súas ferramentas, loitaron contra a inxustiza. Levantaron a voz e gritaron a súa protesta. Algúns pagárono coa vida.
Roberto Saviano sabe do que fala: vive ameazado por denunciar á mafia. Neste libro retrata non a santos impolutos, senón a persoas coas súas debilidades, equivocacións e medos, que decidiron non calar. Figuras históricas como a poeta rusa Anna Ajmátova, que alzou a voz contra o tirano Stalin, e Robert Capa, que co seu cámara plasmou os horrores da guerra. Xornalistas que pagaron coa vida as súas denuncias como Politkóvskaya, Jamal Khashoggi ou Daphne Caruana Galizia. Tamén a sobrevivente italiana do Holocausto Settimia Spizzichino, a monxa Francesca Saverio Cabrini, o poeta chinés Xu Lizhi ou o consultor tecnolóxico Edward Snowden…
Fala ademais de figuras históricas cuxo compromiso político marcou as súas vidas e as súas mortes, como Jean Seberg ou Pier Paolo Pasolini, e de vítimas que provocaron revoltas e cambios, como o afroamericano George Floyd. Pero retrata tamén a algúns monstros, como Joseph Goebbels ou Kantano Habimana, aquel miserable locutor ruandés que coas súas arengas lanzadas desde as ondas alentou o xenocidio no seu país.
Por outra banda, analiza os abusos do nefasto xornalismo de paparazzi dixitais que saca á luz intimidades para afundir carreiras e prestixios, como é o caso da xa clausurada web estadounidense Gawker, que desvelou a homosexualidade de Peter Thiel e publicou o vídeo dunha infidelidade de Hulk Hogan. Ou o caso daquel vídeo íntimo da viceministra de Mocidade de Costa Rica, Karina Bolaños, que alguén filtrou para avergoñala e apartala da política…

Tít. orix.: "Gridalo"