Nos momentos cruciais da súa infancia, a nena sempre tiña a man unha laranxa: agarrábaa, pelábaa e comíaa coma se esa peza de froita fóra a consolala de todos os seus males. Máis tarde descubriu unha froita distinta, máis saborosa, que había que comer ás agachadas, lonxe das faladurías da xente e da mirada inquisidora da súa nai; era unha froita prohibida, pero valía a pena correr o risco e gozar daquela delicia.
Adoptada por un matrimonio evanxélico dunha pequena cidade industrial inglesa, a nena creceu á sombra do fervor relixioso de toda unha comunidade. Os primeiros anos da súa vida foron un ir e vir entre fregueses seducidos polos sermóns e as palabras da Biblia, pero cando tiña pouco máis de dez anos a nena soubo que ela era distinta e que as leis do seu corpo levaríana a descubrir outra forma de amar.

Tít. orix.: Oranges Are Not The Only Fruit