A pesar dos acordos internacionais, a regulación, o investimento público e privado, o progreso técnico e os cambios de comportamento, o consumo mundial de combustibles fósiles aumentou un 55% entre 1997 e 2023. No mesmo período, a proporción de combustibles fósiles no consumo enerxético global pasou do 86% ao 82%. A crúa realidade é que a transición en curso será moi longa e complicada. Opera a unha escala sen precedentes, esixe tecnoloxía que aínda non foi inventada e cantidades inxentes de recursos naturais e expón impoñentes desafíos ambientais, sociais, económicos e xeopolíticos. Debemos escoller: investir un 20% do PIB mundial na transición; decrecer voluntariamente (ou colapsar involuntariamente); ou renunciar ao obxectivo climático de 1,5ºC e fiar así o mundo ao destino, devolvéndolle aos deuses o que a modernidade quixo quitarlles. Velaquí o trilema en torno ao cal vira este breve e fascinante ensaio, escrito por un dos científicos e intelectuais máis orixinais e influentes do noso tempo.

Tít. orix.: Halfway between Kyoto and 2050: Zero Carbon Is a Highly Unlikely Outcome.