Sabina recibe unha carta, a cal sempre estivo a esperar, e este feito verifica a súa crenza sobre o ronsel que deixan no ceo os avións.
Pollywoggy é o amigo de Sabina que lle envía noticias desde a cidade onde se atopa; e nosa protagonista, liña tras liña, irá descubrindo información coa que tratará de adiviñar esa capital misteriosa.
Sabina compartirá todas as súas aventuras con familia e amig@s, con l@s que vai gozar parte do verán e comezo de curso. Diferentes anécdotas moi divertidas e outras non tanto, serannos narradas e apreciaremos a importancia da amizade e do compañeirismo, así como o prexudicial que pode chegar a ser o acoso que se aproveita da vulnerabilidade que desprenden certas persoas.
Nosa protagonista mostraranos que o aburrimento non é complicado de combater e a diversión ―a través de xogos, adiviñas, operacións matemáticas, certas curiosidades, resolución de problemas e enigmas― desvelaranos a relevancia de seguir alimentando a nosa agudeza mental e os beneficios de pertencer á xeración ALPH@.