Comentado por José Enrique B.

Ibáñez fixo moito alén de crear Mortadelo e Filemón, e foi aínda máis que "pai" de Rompetechos, Sacarino ou a familia Trapisonda. Este volume, imprescindible para todo seguidor acérrimo del, conta con 159 páxinas pero semella realmente ser de extensión maior, porque leva contidos amplos e eclécticos que dan para horas de lectura. Céntrase maiormente no seu traballo en branco e negro e en bitono, que nos permite coñecer personaxes menos famosos, caso do dono e o empregado da tenda de animais da Arca de Noé, caso das veciñas dona Pura e dona Pera, de Godofredo e Pascualino, ou do doutor Esparadrapo. Nin siquera falta o xénero do Oeste, con "Cabeza de Ajo, el penúltimo Navajo" e co sheriff de Porra Citty. Non obstante este compilatorio excede as historias de unha ou poucas páxinas, pois presenta reproducións (ás veces, ben é certo, deficitarias, por non partiren de orixinais, seguramente perdidos para sempre) de seccións nas que o historietista traballou longo tempo: encabezados recorrentes nas revistas da editora Bruguera, eis "Incrible pero mentira", "A historia esa vista por Hollywood" ou pranchas que parodiaban deportes múltiples. Hai humor gráfico por encomenda e banda deseñada promocional e completan o mosaico espectaculares viñetas multitudinarias ou panorámicas a páxina enteira (que habitualmente saían en números anuais especiais das revistas semanais) e tamén extractos do boletín interno dos traballadores de Bruguera. Aínda que estritamente disque este libro contén media ducia de páxinas inéditas é probable que conte con moito máis material descoñecido para a maioría dos lectores e lectoras. En conxunto, un verdadeiro cofre do tesouro con especial peso do Ibáñez da década dos 60, un autor carecterizado por dous rasgos: o enorme talento para os tebeos de risa e a capacidade case ilimitada de traballo. Título moi recomendable para amantes da BD clásica de humor.