Umiko é filla e neta de amas, as mergulladoras xaponesas, un oficio tradicional que se herda de nais a fillas. Como as súas amigas, ela non quere seguir a tradición, pasar longas horas nas augas xeadas do océano e correr os perigos do fondo mariño. A pesar diso, sente unha atracción irresistible polo mundo submarino, que se ve acentuada cando coñece ao sobriño do farero, Sasuke, un adolescente vindo de Tokio, co que vive o seu primeiro amor. Ese amor e o océano entrelázanse á historia da súa antepasada Ishi, unha das mellores amas, que desapareceu no mar pouco despois da Segunda Guerra Mundial. A vella mergulladora Kairi, a súa avoa Chinami e o resto das amas irán descubrindo os segredos do mundo sacro e máxico das mulleres mergulladoras.