«Por ser un inmenso espazo de liberdade onde se pode dicir todo, bordear o mal, narrar o horror, liberarse das regras da moral e do decoro, a literatura é hoxe máis necesaria que nunca. Engade complexidade e ambigüidade a un mundo que as rexeita.»
Así ocorre nos seis textos que conforman O diablo está nos detalles entre os que atoparemos relatos á maneira de Chéjov ou apaixonadas elexías á lectura e tamén no esclarecedor diálogo que a autora mantén con Éric Fottorino en Así escribo, que achega as claves do seu universo narrativo e reflexións sobre as dificultades ás que aínda deben enfrontarse as escritoras. Voz consagrada das letras francesas, Leila Slimani fai gala nestas páxinas dunha afiladísima lucidez e unha sutileza capaces de derrubar prexuízos e desmontar clichés.