É Noitevella, os reloxos comezaron a conta atrás e sete mulleres reúnense nunha habitación de hotel en cuxo centro descansa a cabeza do que fora o seu peor pesadelo: Jamie Spellman. Todas elas coñecíano, e todas reafírmanse na súa inocencia, pero cada unha tiña unha razón de peso para asesinalo: a súa esposa enganada, a adolescente que espera un fillo seu, as dúas examantes, a súa mellor amiga, a muller á que violou na universidade e a tía que o criou. As sete levaban semanas reuníndose para falar das súas experiencias e ata, nalgún momento de euforia, imaxinar a súa morte. Apenas teñen tempo para esconder o cadáver e mentres a inspectora de policía Nova Stokoe, exnoiva dunha das sete sospeitosas, comece as súas indagacións, tamén elas desexan averiguar cal se atreveu a facer por fin aquilo co que as demais só fantasiaban.