Por que cando se fala da historia do manga os primeiros nomes que nos veñen á cabeza, case sempre, son de autores? É que seica non hai autoras, editoras, entintadoras… que contribuísen de maneira decisiva á industria xaponesa das viñetas? Nestes Apuntamentos de Cómic, a historiadora da arte Iria Ros Piñeiro estuda cal foi o papel das mulleres no manga desde unha perspectiva histórico-artística crítica que busca poñer en valor a súa contribución ao desenvolvemento do medio. O xénero silenciado busca estimular o pensamento e provocar que os mangas sexan lidos cunha mentalidade algo máis crítica e atenta ás cuestións de xénero. Este libro abrirá a túa mirada á importancia que as mulleres tiveron no desenvolvemento da novena arte e farache reflexionar sobre os estereotipos de xénero, a importancia da igualdade e a necesidade dunha representación equitativa tamén no mundo do manga.