Mercedes volveu dos EUA embarazada dunha filla, Indira, á que nunca lle desvelou a identidade do seu pai. Tres décadas transcorren entre esa viaxe de ida e volta de Ribadomar a Denver, para cursar estudos universitarios, e a de Indira, quen segue as pegadas da súa nai e regresa de América con información inesperada e reveladora.
Con prosa sinxela e ritmo fácil, cun chisco de humor e misterio, sen pudor nin sentimentalismos, narra a vida íntima dunha muller que valora o alleo sempre por riba do propio. O elenco de personaxes é amplo: unha nai omnipresente, unha vidente chicana, un mozo indio; un compañeiro de vida francés; un amante vasco; un vello veciño navegante; un par de amigas ao outro lado do Atlántico ... Amor, soidade e identidade impregnan estas páxinas.