Nathan Tabiz aprendeu esa lección hai moitos anos, igual que aprendeu que o mundo máis aló das murallas do Sacro Reino de Daiva é perigoso e está cheo de demos. Aprendeu, tamén, que o poder do tempo é cobizado e perseguido e que o deber dos celestiais é protexelo. Por iso, cando herdou o Amuleto, xa sabía que xamais debía usalo. Leva toda a vida xurando que non o fará: xurouno cando a súa nai o deixou nas súas mans, xuroullo mil veces ao deus ao que serve, xuroullo outras mil aos seus amigos. Con todo, nunca lle dixo a ninguén todas as veces que quixo romper a súa palabra: cando a súa nai morreu, cando o nomearon Portador, cando deu o seu primeiro bico. Si, Nathan Tabiz sabe que non debe usar o Amuleto. O que non sabe é que a persoa da que namorou morrerá en tres días.