Anzu acaba de modelar e enfornar un delicado vaso de arxila. Está satisfeita, exhibirao na súa próxima exposición, e, como a súa forma lémbralle a dunha campanilla, chámao Suzuran. Porque Anzu é unha nova e reputada ceramista consagrada ao mundo da louza tradicional xaponesa. Está divorciada, vive co seu fillo preadolescente e, por máis que lle insistan as súas amigas, non quere volver namorarse. A súa apracible vida cotiá, nunha cidade xunto ao mar do Xapón e ao pé do monte Daisen, vese alterada de súpeto cando a súa irmá maior, Kyoko, anuncia que ten noivo e que vai casar. O certo é que a relación entre as dúas irmás non é moi estreita; en realidade, as súas personalidades son case opostas. E Kyoko viaxará en breve desde Tokio para presentar ao seu prometido a toda a familia.