No centro desta historia hai unha muller que nunca considerou traer un can a casa. Pero o seu marido, triste pola morte da súa avoa, coa que lle unían fortes lazos desde a infancia, insiste e acaban tendo un. É o primeiro paso para un cambio na vida desta familia sen fillos, pois terminarán mudándose ao campo, a unha hora de Seúl. Ao pouco, xa adoptarían un segundo can.
Nos seus paseos diarios crúzanse con xente e cans de todo tipo, algúns abandonados, outros maltratados polos seus donos ou encerrados en gaiolas, esperando a ser sacrificados ou mesmo cociñados... vestixios de antigas maneiras de tratar aos animais. En Cans, Keum Suk Gendry-Kim parte da súa experiencia persoal para retratar, dun modo insólito, a violencia inherente ao home, pero tamén a necesidade, tan humana, de crear vínculos.