Retratado pola crónica haxiográfica dominante como o heroe da resistencia contra Hitler durante a Segunda Guerra Mundial, e convertido nun dos símbolos da democracia europea -o que se encargan de recordar aínda nos nosos días unha infinidade de camisetas, citas e discursos de coaching-, Winston Churchill pasou á historia con maior gloria que pena. Nun exercicio de xustiza histórica, Tariq Ali proponse aquí desenterrar as palabras e, sobre todo, os actos que quedaron ocultos baixo a longa sombra do político británico máis célebre de todos os tempos.

En "Winston Churchill: Sus tiempos, sus crímenes", Tariq Ali debuxa unha breve historia mundial do sanguinario declive do Imperio británico e analiza acontecementos a miúdo esquecidos, como a catastrófica Partición da India, a represión en Malasia ou a campaña contra o movemento de liberación en Kenia. No plano persoal, revela a simpatía e admiración que Churchill sentía polos fascismos europeos, e debuxa os rasgos dunha mentalidade que o levou a excluir da súa defensa dos valores democráticos aos pobos colonizados, ao movemento obreiro organizado ou ás mulleres.

Título orixinal: Winston Churchill: his times, his crimes