Esta é a historia de Alba Grey, unha muller independente e segura de si que aprendeu desde moi nova a enfrontarse ao destino que lle era dado. Deberá cumprir a promesa que fixo ao seu avó no leito de morte: atopar a uns familiares afastados descoñecidos para saldar unha antiga débeda sentimental. O mellor desta historia son sen dúbida os seus personaxes, ben construídos e tan diferentes entre si: uns móvense por amor; outros viven atafegados pola pesada carga do arrepentimento; outros máis, viven a paixón e a aventura como únicos motores da súa existencia. Unha novela rica en tramas secundarias, que reflicte unha Europa de entreguerras confiada nun futuro que resultará ser diferente ao esperado.