O presente ensaio enfronta a complexa e necesaria tarefa de analizar a calidade democrática na que vivimos, tratando de establecer como chegamos á situación actual de polarización extrema, na que o intercambio de opinións razoadas perdeu espazo e cobertura fronte a unha sociedade do espectáculo onde prima a ruidosa confrontación de puntos de vista irreconciliables. Para iso, o filósofo e político Manuel Cruz establece as causas deste déficit de racionalidade, reflexiona sobre os seus efectos e reconstrúe o debate das ideas, porque rexenerar o diálogo e a controversia crítica é un primeiro paso imprescindible para facer habitable a esfera pública, o ámbito no que se forman as opinións e as vontades.
A proposta do texto non pode ser máis clara e rotunda: ante o eclipse da razón ao que estamos asistindo, inmersos como nos atopamos nunha deriva de incerteza global, tórnase necesario achar instrumentos de pensamento que sexan útiles para formar unha opinión crítica e matizada que nos permita tomar as decisións coas que, entre todos, construímos o espazo compartido.