Alguén quere morrer. Xa non é novo, e pregúntase para que outro día máis, por moi privilexiada, divertida e amable que aínda sexa a súa vida. Alguén quere amar. Non sabe con certeza se lle corresponden, se os seus sentimentos serán entendidos, se ten sequera dereito a expresalos. Alguén viaxa. Visita cidades, praias, bares, festas exóticas, cabanas ao bordo da auga onde pasar a noite bebendo e rindo. Alguén ilustra uns libros preciosos e alguén se ocupa de editalos. Traballan sen présas, con admiración mutua, con certa sensación decadente de existir nun mundo que desaparece. Alguén tivo un grave problema de saúde, levántase amodo, téntase a roupa e decide aproveitar a segunda oportunidade. Alguén gusta, esperta desexo, está sempre de paso na vida dos demais, sorrí, paga a cea. Alguén é o mellor amigo e a persoa favorita doutro. Alguén quere morrer