Claudine e Niní teñen un soño: converterse en bailarina principal da Ópera Garnier de París. Pero as parcas teceron un fío diferente para elas, e, pronto, ese soño crébase. Claudine, ancorada en Montmartre para sobrevivir, con tan só a amizade de Alain e o amor de Adrien como salvavidas, tentará manterse lonxe das bandas que arrasan as rúas. E Niní, arrastrada por un pasado oculto, verá morrer á nena que foi en Togolandia, colonia alemá nun pedazo da misteriosa e afastada África, para renacer como unha muller nova alén do mundo, nun hospital de Zúric.
Pero o fío que as une, como a rede dunha telaraña, non é tan fácil de crebar. Convertidas naquilo do que sempre desexaran fuxir, unha vendendo o seu corpo e a outra os segredos do Imperio, nin a guerra que arrasa Europa nin a enfermidade da tolemia que as ataca poderá cambiar o destino que as agarda…
É esta unha historia de guerra nos albores da Primeira Guerra Mundial, das colonias imperiais, do París de principios de século, dunha Europa que se consome. Pero tamén, e sobre todo, unha historia humana na que as protagonistas emerxen, cos seus defectos e virtudes, como seres eternos que se cravan no corazón. Paixón, amor, traizóns, desvelos, tolemia, maxia ancestral e amizade. Todo iso e moito máis fai desta obra, As damas da telaraña, unha novela absolutamente inesquecible. E á súa autora, Neves Muñoz, a lanza como o que sen dúbida é: unha mestra da novela histórica e do sentir máis humano.