O concepto de calidade sempre resultou escurridizo. A relatividade dos xuízos de valor en estética é algo que desde Aristóteles ata Kant e Croce quedou ben establecido no pensamento europeo, o que supoñía un freo a calquera intento de definir e establecer con claridade conceptual en que consiste a calidade na arte. Alejandro Vergara enfróntase á difícil tarefa de “cercar” este concepto convencido da importancia dese esforzo intelectual e para iso primeiro expoñerá o percorrido sinuoso e esquivo da idea de calidade ao longo da historia do pensamento occidental e posteriormente, baseándose no seu amplo e recoñecido coñecemento da pintura europea dos séculos XV ao XVIII, adéntrase nunha exposición práctica, acompañándonos a descubrir, coma se se tratara dunha indagación detectivesca, que se entendeu en Europa por calidade durante tres longos séculos nos que se produciu gran parte da mellor pintura europea.