Ramón Boldú cambia o foco e da súa habitual mirada autobiográfica pasa a centrarse na historia de Alan, un mozo transxénero fan de Batman –era coñecido como Bat Alan– que, con 17 anos de idade e tras sufrir serios problemas de bullying na escola, acabou suicidándose. O autor catalán pon luz sobre unha traxedia cunha nada disimulada vocación de concienciación: servir de axuda para evitar que se lle faga a vida imposible ás persoas diferentes ata tal punto que os agredidos tomen o desesperado camiño de quitarse a vida.