China está lonxe. É o primeiro que aprende un xornalista destinado nun extremo do mundo ao que nunca prestamos demasiada atención. Cando Mavi Doñate chegou a Pequín no verán de 2015 coa vertixe aniñada no estómago, cumpriu un soño que a acompañaba desde nena: ser correspondente. O que non podía imaxinar entón é que estaba a piques de protagonizar unha das etapas de maior intensidade informativa deste primeiro tramo de século. O seu relato persoal dos seis anos que viviu no xigante asiático, elaborado a partir dos recordos e as voces que quedaron fóra da información diaria, ofrécenos un valioso retrato da China actual. Estas páxinas percorren os contrastes dun país en constante reinvención e lévannos da política internacional á vida cotiá; da modernidade sen freo ás tradicións máis arraigadas; do bulicio nas rúas polas celebracións do Aninovo ao silencio dos peores días da pandemia, e lémbrannos que, durante décadas, vivimos de costas a ese dragón milenario que esperaba o seu momento para espertar.