Bibliografía

A modo de introdución : pensando o cinema galego / Xosé Nogueira. O lugar da mirada : unha aproximación xeocrítica á construcción discursiva e simbólica ao NCG / Cristina R. Lesmes. As marcas do procesual nos límites da experimentación do Novo Cinema Galego / Fernando Redondo Neira e Xurxo González Rodríguez. Políticas de Representación no Novo Cinema Galego : do modelo Zeitun á Estética da Resitencia / Iván Villarmea Álvarez. Espazos da memoria, espazos da ausencia / Jaime Pena. Habitar un espazo : a construción do lugar no NCG / Julio Vilariño Cabezas. Cine, paisaxe, pintura : unha ollada ao audiovisual galego contemporáneo / Sara Donoso. De feminismo e “performance” no NCG / Margarita Ledo Andión. “A caza dos gatos”, de Lara Tigre. A “okupación” performativa do espazo público / Lara Rozados Lorenzo. Unha historia do cinema experimental en Galicia : a traxectoria de Ángel Rueda / Gonzalo E. Veloso. Unha nube de mosquitos / Alberte Pagán. A década prodixiosa : o NCG en dez fitos / José Manuel Sande.

Cumpridos xa máis de dez anos des que o crítico, programador e produtor Martin Pawley cuñou, en complicidade con Xurxo González, a etiqueta Novo Cinema Galego, parece chegado o momento de facer balance acerca do acontecido na nosa cinematografía ao longo desta última década. Neste sentido, o presente libro non pretende tanto historiar o cinema galego dos últimos anos como propor unha serie de reflexións de carácter poliédrico desenvolvidas por autores que combinan diversas disciplinas (nalgúns casos conflúen varias na mesma persoa), de maneira que poidan resultar complementarias ás xa existentes. Como resultado, o lector atoparase cunha rica malla de entrecruzamentos que mesmo rebordará a estrita denominación de Novo Cinema Galego tentando espallarse cara a outras propostas e prácticas. Asemade, a enorme mutación propiciada polos soportes e canles dixitais comportou felizmente a transformación das posibilidades de creación e difusión e mais a irrupción da ollada propia ou —mellor— dun heteroxéneo e rico conxunto de miradas, ben que en último termo vencelladas entre si por unha serie de trazos comúns. Unhas miradas que chegaron lonxe, que rebordaron de vez as fronteiras do noso país e que demostraron que si, que definitivamente prendeu o lume na periferia. Vaiamos, pois, cara a el.