A repentina chegada duns invasores vindos do espazo rompe a harmonía do doce e acolledor planeta Topói. Estes intrusos, os buzardos, destruirano todo ao seu paso se é necesario para conseguir atopar o Ultralazer, unha forza misteriosa da que pouco se sabe, á parte de que está estreitamente vinculada ao rei dos animais. Este último é o deus vivo que mantén o equilibrio de todo e todos no planeta. Ninguén o viu xamais, menos Horb e Bouko, os seus gardiáns e servidores, que se poñen inmediatamente en marcha para organizar a resistencia. Humor, acción e amizade: abrir o primeiro tomo desta saga é entrar nun universo abafador e colorido e empezar a camiñar por un carreiro cheo de sorpresas.