Unha mirada abonda para que prenda o amor, un dos feitos máis extraordinarios da condición humana. Porén, moitas veces ese amor é declarado ilegal e os amantes son perseguidos, renovándose dese xeito a historia do amor condenado, prohibido e reprimido. Tamén decote sucede que os amantes non están sós. A súa astucia, resistencia e convicción conta coa lealdade dos amigos, que poñen ouvido e corazón sobre a presenza firme dun amor renovado no formidable do seu emerxer, comezando así unha peripecia que será unha loita máis a prol de coñecemento e da liberdade. Velaquí a cerna desta novela na que a meditación sobre o sentido da vida se une á reflexión sobre o sentido da resistencia, de presentarlle batalla á inxustiza e a opresión que impiden o aberto movemento da vida en toda a súa desexada potencia.