Dous homes, un na ficción e outro na realidade, tiveron a oportunidade de matar a Hitler antes de que este desencadease a Segunda Guerra Mundial. A partir deste feito, Javier Marías explora o envés do "Non matarás". Se eses homes quizá deberon disparar contra o Führer, cabe a posibilidade de facelo contra alguén máis? Como di o narrador de "Tomás Nevinson", "xa se ve que matar non é tan extremo nin tan difícil e inxusto se se sabe a quen".
Tomás Nevinson, marido de Berta Isla, cae na tentación de volver aos Servizos Secretos tras estar fóra, e propónselle ir a unha cidade do noroeste para identificar a unha persoa, medio española e medio norirlandesa, que participou en atentados do IRA e de ETA dez anos atrás. Estamos en 1997. O encargo leva o selo do seu ambiguo ex-xefe Bertram Tupra, que xa, mediante un engano, condicionara a súa vida anterior.
A novela, máis aló da súa trama, é unha profunda reflexión sobre os límites do que se pode facer, sobre a mancha que case sempre trae a evitación do mal maior e sobre a dificultade de determinar cal é ese mal. Co transfondo de episodios históricos de terrorismo, "Tomás Nevinson" é tamén a historia de que lle sucede a quen xa lle sucedeu todo e a quen, aparentemente, nada máis podía ocorrer. Pero, mentres non terminan, todos os días chegan...