Este libro, situado nos chamados «estudos críticos do patrimonio», analiza as relacións de poder subxacentes aos procesos de patrimonialización desde a crítica patrimonial feminista.
Baseándose nun traballo de campo de longo percorrido, coa etnografía como método de investigación propio da antropoloxía, a autora dá conta de dous procesos de patrimonialización interrelacionados entre si: da Costa da Morte e da elaboración de encaixes de palillo de Camariñas por parte das palilleiras. Facendo un percorrido que vai «da paisaxe ao corpo», analiza que ocorreu para que un lugar periférico e caracterizado como maldito e unha artesanía téxtil, elaborada desde hai séculos por mulleres desde un paradigma económico e mesmo industrial, pase a considerarse algo valioso e parte do noso patrimonio. Neste proceso ambos os elementos víronse transformados substancialmente ou, máis ben, a relación que teñen as persoas con esta paisaxe e con esta práctica.