Dorita, Fina e Carmen son tres octoxenarias que, co pretexto de facer o Camiño de Santiago, escápanse da residencia de anciáns onde viven o verán do desconfinamento. En realidade, Dorita ten unha materia pendente en Tarragona, e convenceu a Carmen, que ten carné de conducir, e a Fina, que é dona dun vello Volvo 850, para que a acompañen. A Fina, que sofre un principio de demencia, van convencéndoa de que están a facer o roteiro que leva a Santiago de Compostela, aínda que tomaron xusto o sentido contrario, cara ao Mediterráneo. Mentres asistimos aos apuros destas tres aventureiras polo interior de España, a novela reconstrúe os momentos máis singulares das súas vidas e os motivos que xustifican tan insólita escapada.