As irmás Telma e Celia viven en Vigo. Telma é unha enfermeira que se preocupa polos seus pacientes e que presta especial atención a un ancián chamado Pío. Celia, dous anos máis nova, acaba de ascender a xefa de departamento na súa empresa, pero non se sente a gusto na compañía. As comidas dos mércores na casa da súa avoa Gala, un importante referente para as irmás, son o máis sacro para as tres.
Cando a avoa falece, as irmás len xuntas as memorias que lles deixou e descobren moitos detalles que descoñecían de Gala, unha muller forte que perdeu ao seu primeiro marido e o seu gran amor cando a súa filla, Amparo, tiña só dous anos. Afortunadamente, volveu atopar a felicidade á beira do seu segundo marido, Rodrigo, o avó que coñeceron as dúas irmás.
Unha novela sobre a importancia das non sempre fáciles relacións familiares, sobre as perdas que sufrimos ao longo das nosas vidas, sobre os segredos que se gardan e a memoria que axuda a recuperalos.