No Mosteiro de Santo Estevo de Rivas do Sil celébrase a entrega dos premios aos galegos do ano. A noite ameaza tormenta, e un feito violento obrigará a pechar o recinto baixo sete chaves, co que todos se converten en sospeitosos. A arqueta cos nove aneis dos nove bispos está detrás de todas estas mortes, que o pai Afonso decidiu protexer coa súa propia vida. A inmensidade da Ribeira Sacra protagoniza esta trama repleta de enganos e sufrimento, onde o «ollo por ollo, dente por dente» cobra protagonismo. Paola e o seu equipo terán que pescudar que se esconde detrás dos pasadizos do parador que se transformaron en corredores da morte.