Comentado por Iria C.

Esta é unha película que se pode ver como dous filmes independentes de duración media, xa que parten da mesma premisa, pero presentan variacións no desenvolvemento da trama.

Un director de cine viaxa a unha cidade para asistir á proxección da súa película cun día de antelación e, mentres fai turismo, coñece a unha artista coa que pasará o resto do día. Tomarán algo, visitarán o estudio de pintura da muller, cearán xuntos e reuniranse con amigos dela xa entrada a noite. Todos estes sucesos teñen lugar en ambas as dúas versións da historia, pero, desde o meu punto de vista, será a maneira en que un aspecto clave da vida do director sae a luz o que determinará unha diferenza fundamental na relación que se establecerá entre os dous protagonistas.

Ahora sí, antes no é unha película de diálogos, que pode, por isto, resultar tediosa nalgúns momentos, pero que noutros nos ofrece deliciosas esceas de conversa —como a do café, na que ela fala do seu oficio de pintora, ou a do estudio, na que el interpreta as súas pinturas— con fermosas e iluminadoras reflexións.

Tanto actor como actriz están moi convincentes nos seus papeis e para gozar por completo das súas interpretacións é moi recomendábel visionar a película en versión orixinal, con subtítulos en español se non sabemos coreano.